CBN: Upatmi Salai Ceu Bik Thawng, Chin Broadcasting Network (CBN Australia hram punhmi Media) he biaruahnak caan na kan pek caah kan I lawmtuk.Kan biahalnak ah kal colh ko usihlaw, a liam cia 2015 Kawlram thimnak ah Chin Party chung in thutden pakhat hmanh nan rak lakkhawh lo kha zeiruang bik ah dah a si?
CBT: Atlangpi in a ruang pali ka langhter lai. Pakhatnak ah – Chin party nan kuai tuk timi. Cucaah atucu kan van ifon cang. Pahnihnak ah kum 20 leng Aung San Suu Kyi a intuar caah laksawng suiluchin chinh ve hrim ko usih timi. A pa thumnak cu ralkap le a unau a simi USDP thlaak ahauh caah Chin party kan pek ahcun an tla lo sual lai timi. A taktak ahcun hihi ruahpalhmi a si. Kawl rawn ah NLD siseh tlangcung ah miphun party si usih law USDP an rak luh khawhnak awngkua a um lomi khi si– mipi hlen an rak si. A pa linak cu NLD lawng nih phunghrampi a remh khawh i federal an kan pek lai timi bia. Hi zong hi a palhmi a rak si. Remdaihnak biaruahnak le phunghrampi remhnak ah NLD nih an policy an chuahpimi ah federal kong le tlangcungmi kong tlaang zong aa tel sual lo. Hihi tuanpi in kan rak chim cia si ko nain mipi tampi nih an rak kan zum lo i NLD an rak zumh tuk hna. Cun NLD lawng nih phunghrampi a remh khawh timi zong hi a palh cikcek cumu. NLD amah lawngin phunghrampi cu mu khat hmanh a thleng kho lo– ralkap le tlangcung party dihlak hnatlak a hau. Party pakhat lawngin 75% nak tam ngah khawhnak upadi nih a awnh lo.
CBN: A liamcia CNDP cu 21st Panglong Conference kongkau ah party dang cu an kai kho hna nain . “Zabu-21-Pinlung Civui ahhin tlangcung miphun party 17 leng an kai kho a sinain Chin Party lei in minung pakhat hmanh nan rak kai lo mi kha zeiruang bik ah dah si?
CBT: NCA minsenthutmi ah ‘ramkhel party pawl’ zong itel ding tiin an tial ko nain ASSK nih ‘MP pakhat hmanh hmu lomi cu kai hna hlah seh a ti caah si. Chin party cu MP pakhat hmanh cu kan nei fam lo cuteh. Tlangcung miphun party tling in Panglong cabuai ah an tlin lioah kannih Chin party kan kai khawh lo kha ningzak taktak a si. Kan party ningzah lawng si lo, kan miphun ningin ningzah awk thil a si.
CBN: CNDP cu Laitlang hmanh a huap lo: tiah NLD Thantlang Vice- Chairman nih cathanh a rak chuahmi kong ah khan fiang deuh in theih kan duh ko?
CBT: CNDP nihkhan 2015 thimnak lioah MP hmun 57 kan rak icuh. Laitlang ah hmun 39 azate in kan icuh (NLD cu hmun 38 lawng a rak icuh) hlei ah Kawl Rawn i Chin miphun ting 5 leng umnak hmunkip ah hmun 18 ah kan icuh. Kanmah party tluk in Chin miphun dihlak umnak ah miphun thantar le miphun suttung a dirh khomi mizei buu hmanh an rak um lo. Mipi nih me an kan pek duh lo lawng a si.
CBN: A tu cu Chin party ngan pathum nan I funtom cang I, thimnak ding zong a nai cang, Chin Party nih nan I tinhmi mipi nih theih kan duh ko?
CBT: Kan party nih kan kawltung pathum cu Myanmar ram ah federal ngahnak ding; miphun vialte itluktlaang ding (national equality) le Chin miphun mahte-khuakhannak (self-determination) ngahnak ding kha a si ko. Phundang in chim ahcun Panglong in Kawl pawl nih an kan chuhmi kan miphun covo vialte khuakhirh tthan ding kha a si ko. CNF he kan policy ai khat ko. Democracy le thanchonak development te hna cu a luang cuahmahmi a si ko. Kawl hi 60% renglo an si caah cu hna sin in kan miphun covo khuakhirh than nak dingah minung pakhat le phu khat lawngin a za lo i tlangcungmi kan dihlak in ifun le kuttlaih in ttuan a herh lio caan a si. 2020 Thimnak ah Laitlang ah cozah kan ser tikah zeitindah rian kan tuan lai timi policy manifesto tucu dal 12 in tlangtar kan then i research catluan kan tial cuahmah liopi a si. Mifimthiam tampi zong kan iruaih hna. Cu chungah tlangtar-tthen 50 leng a um te lai. Cucu tukum chungah kan lim lai i cauk in kan chuah te lai. Kannih party CEC hruaitu 39 chungah hin a tamdeuh cu ramdang sianginn dihmi le ramkhel le upadi kong le thanchonak kongah rampi huap in cawnpiaktu zongah sawm lengmangmi kan si. Cun mifimthiam tampi nih an kan dirpi, an kan kulh. Cucaah Laitlang nana ahcun NLD le USDP nakin rian kan tuan khawh deuh lai kan ti ngam nak a si.
CBN: A ralai mi 2020 ahhin CNLD nih Chinram ah teinak hmu ulaw zei rian dah a biapi bik in tuan ding nan I timhmi?
CBT: A cungah ka van in leh cang ko khih. Kannih cu miphun luatnak le covo khuakhirh kha biapi bik ah kan ihmaithlak rih ko lai. Kum 2020 thimnak dih hnu remdaihnak ramkhel cabuai ah CNF le tlangcungmi ramkhel buu hna he biatak tein kan miphun covo le rampi federal ngahnak ding caah ttangti in hmai kan nawr lai. Cun, Kan ramri an kan enmi vialte khuakhirh ahau. Kan biakinn vialte 99% laisen an kan pek lomi pawl le biaknak namnehnak a kan tuahmi pawl vialte zong kan donghter hau cang. Kan vawlei le kan loram zong miphundang kut ah a phanh dih lo ding kilven hau cang. Kan ca kan holh le kan nunphung kilven le thanchoter dingah miphun dang bochan awk tha ti lo. >>>>>>> Pehthan te ding
