Yangon : Myanmar ramchung ah Mobile phone a hmangmi vialte June ni 30 ah ID card (Hmatpungtin) he an SIM card register tuah viar ding in Myanmar Telecommunication Department nih theihternak an tuah, June ni 30 tiang ah hmatpungtin he SIM card Register a tuah lo mi paoh an SIM card thah piak viar an si lai.
Ministry of Transport and Communication Department lei nih an chim ning ah “Mobile Phone zuarnak dawr ngeitu hna nih Hmatpungtin pakhat hmangin SIM cards za reng lo an cawk i an Mobile Phone zuarmi an caw tu hna sin ah an rak zuar than ve tawn”
“zalawng te in zuarnak nawl an ngei ko e, a si nain a cawtu Mobile Phone hmangtu hna nih an SIM card hmanmi ah harnak/hnahnawhnak pakhat khat an ton ah cun an mah mawh a si” tiah an chim.
Department nih theihternak an tuah ning Myanmar SIM card a hmangtu vialte, an SIM Card cu Hmatpungtin he felfai te in register tuahmi a si le silo check than viar ding, felfai te in register tuah lo mi SIM card paoh paoh Network Operator sin ah a hmangtu Hmatpungtin he register tuah than viar ding in theihternak an tuah.
Kan Hnung kum October thla ah khan Telecom Operator MPT, Telenor, Ooredoo le MyTel hna cu an SIM card felfai te i register tuah lo in zuar le a cawtu hna Hmatpungtin register tuah bak lo i zawrh hna ruang ah Ministry nih US dollars $100,000 (144 million Kyats) cio dan a rak tat cang hna.
2014 ah khan Ministry nih SIM Card zuar le cawk ning phunghram fek te in a rak ser cang i Network Operator hna sin ah felfai te in cu phunghram cu theihter a rak si cang.
Kum 2017 ah khan felfai te i Register tuah lo ruang ah SIM Card hman lio mi 6.5 million SIM card thah piak an rak si cang.
Kum 2019 April thla ah khan Ministry nih ri a rak khiah i Hmatpungtin pakhat nih SIM card pahnih tiang lawng cawk le Register tuah khawh a si tiah ri a rak khiah.
Koo Zaw Zaw Myo nih a chim ning ah SIM card a cawtu hna nih an hmannak ding Information tha te i cazin an tuah ko ah cun Hmatpungtin pakhat nih SIM card pahnih nak tam zong cawk khawh a si ko tiah a chim. ( bianabia ah : SIM card thlau sual ah cun register an tuahnak hmatpungtin hmang in a dang cawk than le register tuah than khawh a si)
Department nih an langhter ning ah a tu ah hin SIM Card 80 million hman lio a si i hi lak ah SIM Card 28.8 million cu register felfai te i tuah lo mi a si, a sullam cu Hmatpungtin bon in register tuah mi hna an si, June ni 30 tiang ah felfai te i register an tuah lo ah cun SIM Card 28.8 million cu thah piak hau ding an si, Register tuah than nak ah hin Hmatpungtin, Passport le Driving License hna hman khawh a si tiah an langhter.
CBN News
